صوبائی اعداد و شمار: بلوچستان میں صورتحال سب سے ابتر رپورٹ کے مطابق، پنجاب میں اسکول نہ جانے والے بچوں کی مطلق تعداد سب سے زیادہ ہے، جہاں 97 لاکھ بچے تعلیم سے محروم ہیں۔ تاہم، تناسب کے لحاظ سے بلوچستان کی صورتحال سب سے زیادہ سنگین ہے، جہاں اسکول جانے کی عمر کے 69 فیصد بچے (تقریباً 35 لاکھ) اسکولوں سے باہر ہیں۔ سندھ میں یہ تعداد 74 لاکھ (44 فیصد) اور خیبر پختونخوا میں 45 لاکھ (34 فیصد) ریکارڈ کی گئی ہے، جبکہ وفاقی دارالحکومت اسلام آباد میں بھی تقریباً 90 ہزار بچے اسکولوں سے باہر ہیں۔
صنفی امتیاز اور سماجی رکاوٹیں یونیسف کا کہنا ہے کہ سندھ اور خیبر پختونخوا میں صنفی فرق انتہائی نمایاں ہے، جہاں اسکولوں سے باہر لڑکیوں کی تعداد لڑکوں سے کہیں زیادہ ہے۔ اس کی بڑی وجہ سماجی و ثقافتی رکاوٹیں اور لڑکیوں کی تعلیم کے حوالے سے پائے جانے والے ڈھانچہ جاتی مسائل ہیں۔
تعلیمی بجٹ میں تاریخی کمی رپورٹ میں پاکستان کے تعلیمی بجٹ پر گہری تشویش کا اظہار کرتے ہوئے بتایا گیا ہے کہ پاکستان تاریخی طور پر تعلیم پر جی ڈی پی کا 1.5 فیصد خرچ کرتا رہا ہے، جو پہلے ہی بین الاقوامی معیار (4 سے 6 فیصد) سے بہت کم تھا۔ تاہم، پاکستان اکنامک سروے 2024-25 کے مطابق، یہ اخراجات مزید کم ہو کر جی ڈی پی کے محض 0.8 فیصد پر آ گئے ہیں، جو کہ ایک ریکارڈ کمی ہے۔ مزید برآں، تعلیمی بجٹ کا تقریباً 90 فیصد حصہ اساتذہ کی تنخواہوں اور انتظامی اخراجات کی نذر ہو جاتا ہے، جس سے اسکولوں کی حالت بہتر بنانے اور تعلیمی مواد کی فراہمی کے لیے بہت کم گنجائش بچتی ہے۔
مستقبل کا لائحہ عمل اور تجاویز یونیسف نے حکومت پاکستان کے ساتھ مل کر اس بحران سے نمٹنے کے لیے کئی حل تجویز کیے ہیں۔ ان میں ارلی چائلڈ ہڈ ایجوکیشن (ECE) پر سرمایہ کاری، اسکولوں سے دور بچوں کے لیے متبادل تعلیمی راستوں (ALP) کا فروغ، اور اسکول و کمیونٹی کے درمیان روابط کو مضبوط بنانا شامل ہے تاکہ بچوں کے داخلے کو یقینی بنایا جا سکے اور اسکول چھوڑنے کی شرح کو کم کیا جا سکے۔
رپورٹ میں زور دیا گیا ہے کہ جب تک تعلیم کے لیے بجٹ میں اضافہ اور اس کا منصفانہ استعمال یقینی نہیں بنایا جاتا، پاکستان کے لیے اسکول سے باہر بچوں کے بحران پر قابو پانا ایک مشکل چیلنج رہے گا۔
مزید پڑھیں:
پاکستان صنفی مساوات میں ایک بار پھر دنیا میں سب سے نیچے: عالمی اقتصادی فورم کی رپورٹ